Qolka ugu ilaalada xoogan aduunka iyo meesha uu ku yaalo

0

Xafiiska ama qolka 39-aad wuxuu ku yaallaa caasimadda dalka Kuuriyada Waqooyi ee Pyongyang, wuxuuna saldhig u yahay madaxda ugu sareysa ee dalkaas, sida laga soo xigtay ilo xog ogaal ah.

Inkastoo dalka Kuuriyada Waqooyi lagu tilmaamo in uu yahay dal go’doon ah, kana go’an dunida inteeda kale, haddana xafiiska wuxuu ka mid yahay meelaha aanan la booqanin ee aanan la oggoleyn in qofwalba uu soo arko, maadaama waxwalba oo ka dhex socda ay yihiin waxyaabo sir ama xasaasi ah.

In kastoo ay adag tahay tahay in wax laga ogaado madaxda dalkaas iyo waxyaabaaha ay qabtaan, haddana qol lagu magacaabo “Room 39” ama qolka 39-aad, ma ahan mid loo dhowaan karo.

Waa xafiis aad loo ilaaliyo kuna dhexyaala dabaqa 3-aad ee dhismaha xisbiga shaqaalaha dalkaas ee magaalada Pyongyang.

Way adag tahay in qof uu u dhawaado dhismahan sida ay sheegeen qaar ka mid ah warbaahinta caalamka. Waa saldhiggga saraakiil sarsare oo katirsan dowladda Kuuriyada Waqooyi iyo xisbiga talada haya.

Waxbadan laga ma oga qolkan, haseyeeshee dad aqoon u leh ama la soo shaqeeyay xukuumadda dalkaas waxay sheegeen in qolkaas uu yahay goob ay si gaar ah ugu kulmaan hogaamiyaha wadankaas iyo saraakiisha militeriga.Kim Jong-un fuels nuclear arms obsession by making workers cook meth inside  secret Room 39
Ri Jong oo ah sarkaal horay uga tirsanaa xukuumadda Pyongyang, oo in muddo ah uu ka soo shaqeeyay, oo u warramay telefishenka CNN ee Mareykanka ayaa sheegay in waxyaabaha lagu qabto qolka 39-aad ay ka tahay lacag loogu geeyo saraakiisha sarsare ee dalkaas.

Dowladda Mareykanka ayaa horay u sheegtay in qolka 39-aad uu yahay mid lagu qabto hawlo sharci darro ah.

Wasaaradda maaliyadda ee dowladda Mareykanka ayaa xafiiskaas ku tilmaamtay in uu yahay mid qeyb ka ah laamaha dowladda dalkaas, kana taageera hoggaanka dalkaas arrimo ay ka mid yihiin sidii ay u heli lahaayeen dhaqaale.

“Xafiiskan wuxuu ka shaqeeyaa lacagaha la kala gudbiyo, waxyaabaha been abuurka ah, dhoofinta lacagaha kontorbaanka ah iyo maandooriyaha,” ayaa lagu sheegay qoraal ka soo baxay wasaaradda maaliyadda ee dowladda Mareykanka, oo warkan soo saartay xilligii madaxweyne Obama.

Bangiyo iyo shakhsiyaad lala xiriiray xafiiska 39-aad ayay dowladda Mareykanka ku soo rogtay cunaqabateyn dhaqaale.

Midowga Yurub ayaa dhanka kale sheegay in xafiiskan oo la asaasay sannadkii 1994, uu si toos ah u hoos tegi jiray Kim Jong-un aabihii oo lagu magacaabi jiray Kim Jong-Il, balse markii uu geeriyooday waxaa la wareegay Kim. Waxay ku tilmaameen xafiis lagu sameeyo lacagah qalaad.

Midowga Yurub ayaa cunaqabateyn ku soo rogay shirkado lala xiriiray xafiiskaas oo ay ku tilmaameen mid loo adeegsado fududeynya hawlaha xafiiska 39-aad.

Wargeyska The times ee ka soo baxa dalka Britain ayaa ku soo warramay in sirdoonka dalal badan oo caalamka ah ay in muddo ah isku dayayeen in ay wax ka ogaadaan waxa ka dhex socda xafiiskan oo ay adag tahay in la helo macluumaad la xiriira.

Khubarada arrimaha sirdoonka waxay sheegayaan in Kim uu si la mid ah sidii aabihii uu sameystay dad isaga daacad u ah, kuwaas oo ka tirsan militeriga, sirdoonka iyo laamaha kale ee dowladda, oo u keena waxwalba oo hanti ah oo uu u baahan yahay sida baabuu iyo lacag.

Sida la soo weriyay, xafiiskan waxaa inta badan maamula xubnaha qoyska Kim Jong-un.

Sirdoonka Mareykanka iyo kuwa badan oo dalalka reer galbeedka waxay sheegeen in Kim Jong-un walaashii, oo lagu magacaabo Kim Yo-Jong, ay u xilsaaran tahay hawlaha qolka 39-aad. Sidoo kale ninka qabo gabadhaas ayaa la sheegay in isaguna uu ka mid yahay dadka ugu sareeya ee maamula xafiiskan.

Wargeyska Washington post ayaa sidoo kale ku soo warramay in waxyaabaha kale ee uu qabta xafiiskan ay ka mid tahay in hub laga iibiyo dalal ku yaala qaaradaha Afrika, Aasiya iyo bariga dhexe, waxaana taasi lagu tilmaamay mid xadgudub ku ah cunaqabateynta hubka ee Gollaha Ammaanka ee Qaramada Midoobay ee tirsiigiisu yahay 1874.

Waxaa kale oo la sheegay in xafiiskaas uu xiriir la leeyahay shabakado la sheegay in ay sameeyaan lacago been abuur ah oo ay ka mid tahay lacagta doollarka Mareykanka.
Xigasho BBC